Oh My Papa

Sa lahat ng bakla dito sa bukid namin, si Kirat lang ang may problema sa Tatay niya.

OK ang tatay ko. Walang reklamo.

OK din ang tatay ni Fiona. Nasa bahay na lamang ito matapos ang ilang taong pagsasaka.

Ang tatay ni Red, nagtatrabaho sa munisipyo bilang driver ng dump truck.

Ang tatay ni Glydel ay isang empleyado sa municipal court dito sa amin.

Ang Tatay naman ni Kaye ay syang nag-aasikaso sa niyogan nila.

Lahat ng tatay namin di pumapalag sa pagiging bading namin.

Kung ang tatay ni Kirat ang pinakamasamang ama sa sanlibutan-- binubugbog kasi nya noon ang bakla sa kadahilanang isa itong bakla --ang tatay naman ni Patricia ang matatawag na perfect father.

Kahit lampas biente na ang bakla, tabi pa rin sila ng ama kung matulog. At, dapat nagpapaalam ito sa kanya kung sa bahay namin matutulog.

Araw-araw, automatic ang P20 unlimited load ng bakla, courtesy of his father dearest.

At kapag sumasali ito ng Miss Gay Pageants, todo suporta ang kanyang ama. Proud sa kanyang anak.

Pero noong isang araw, nagkaroon ng mild stroke ang tatay ni Patricia.

Panic ang bakla sa umpisa. Pero nang maglaon e natanggap na rin niyang medyo deformed na ang mukha ng tatay niya. Hirap na rin itong tumayo ng mag-isa.


"Sa left side ng katawan niya ang medyo paralyzed," kwento ng bakla sa amin kagabi.


Mula noong mild stroke, di na gumagala ang bakla. Busy sya sa pag-aasikaso sa kanyang ama.


"At least man lang mapagsilbihan ko siya," sabi niya.


Kasama sa pagsisilbi niya ay ang pag-alalay tuwing itoy iihi, maliligo, hihiga, tatayo, kakain o pag-inom ng tubig.


At kaninang umaga, matapos mag-agahan, sa tulong ng isang anak, dumiretso ang Tatay ni Patricia sa kuwarto at nahiga.


Ikinagalit ito ng bakla.

"Di ka dapat humihiga pagkatapos kumain," sabi niya sa ama habang inaalalayan itong tumayo.


"Bakit?" tanong ng ama.


"Ewan ko,"sure na sagot ng bakla.


"E di ka pala sure," sabi ng ama.


"Basta sunod ka na lang," sabi ng bakla.


"Bakit nga?" tanong uli ng ama.


"Kasi..." hindi sya sigurado sa isasagot.


Inantay ng tatay niya ang sagot.


"I care for my job! I care for you!" nasabi ng bakla.


"OK Sharon," sagot ng Tatay.