Eskandalo

"Kanya-kanyang eskandalo lang naman tayo," ang linya ni Kulot sa nangyari kay Red.

Ito rin ang sinabi ko sa kanya noong nabuntis ang kapatid niyang babae four years ago.

Pero nauna nya itong sinabi sa akin seven years ago, noong tinanong ko sya kung di ba sya nahihiyang malaman ng lahat ang relasyon namin.

"Kanya-kanyang eskandalo lang yan. Lahat ng pamilya dito may baho. Lahat ng tao hindi malinis," sabi nya sa akin.

Totoo naman. Eto ang mga halimbawa.

Ang kapitbahay naming si J ay may relasyon sa byudang barangay kagawad na si N.

Ang kabit naman ng kapitbahay naming si E ay si M na ang asawa ay nasa abroad.

Meron din kaming kapitbahay na lagi na lang nag-aaway kasi sugarol si lalaki.

Meron ding sugarol si babae.

Meron namang mga addict ang mga anak.

O di kaya ang pamilya ng magnanakaw.

O ang pamilya ng mga tsismosa.

O ng mga malalandi.

Sa mga bakla, ganoon din. Kanya-kanyang eskandalo lang.

Kay Kaye-- may topak sa ulo ang kanyang ama.

At nang mapag-usapan namin ito, nagsilabasan ang mga baliw sa bloodline.

"Sa amin medyo malayo, sa side ni Mama," sabi ni Kulot.

"Sa amin din, sa side ni Papa," sabi ni Glydel.

Ganoon din daw kay Red. Meron din sa side ng Tatay niya.

"Sa amin wala," sabi ni Fiona.

"Ikaw lang," dugtong ko.

"Mas masakit lang sa yo Kaye kasi Tatay mo mismo," sabi ni Kulot.

Hindi umimik si Kaye. First time kasi ito na openly pinag-usapan.

Matagal bago nagsalita si Kaye.

"Kaya nga minsan di ako umuuwi sa amin kasi nahihiya ako," sabi nya.

"Nahihiya kanino?" tanong ko.

"Sa mga kapitbahay namin," sabi niya.

At dito binitawan ni Kulot ang kanyang ever-favorite line.

"Kanya-kanyang eskandalo lang yan," sabi niya.

Sang-ayon kaming lahat. Pati si Kaye.